Чемпионнан эксклюзив

Қазақстан атынан 7-ші қысқы Азия ойындарына қатысқан 142 спортшы құрама қоржынына 32 алтын, 21 күміс және 17 қола жүлде салды. Бұл отандық спортшылардың айтулы жеңісі. Қазақстан жалпыкомандалық есепте бірінші орынға ие болды.

4 қаңтарда ерлер арасындағы мәнерлеп сырғанаудан жарыс аяқталды. Екі сайыс қорытындысы бойынша  208,89 ұпай жинаған қазақстандық Денис Тен 7-ші қысқы Азия ойындарының чемпионы атанды. Қысқа бағдарламадан кейін бірінші орында келе жатқан Денис еркін бағдарламада қателікке бой алдырып, оның қорытындысы бойынша үшінші нәтижеге қол жеткізді. Алайда, қысқа бағдарламада жинаған ұпай саны жалпы есепте алтын жүлдеге ие болу үшін жеткілікті болып шықты.

Астанада мәнерлеп сырғанаудан жарыстар күнде болып жатқан жоқ. Мұндай деңгейдегі жарыс елордада тұңғыш рет өткізіліп отыр. 7-ші қысқы Азия ойындарының шеңберінде көрермендер ең көп қызығушылық танытқан спорт түрлерінің бірі - осы мәнерлеп сырғанау болды. Республикалық велотректе ине шаншар жер жоқ, билеттер сайыс басталардан бірнеше күн бұрын сатылып кеткен.

Астаналық спортшылар Қазақстан ұлттық құрамасының қоржынына екі алтын жүлде салды. Спорттық бағдарлау жарысы бойынша құраманың көшбасшысы Ольга Новикова мен Михаил Сорокин өз қарсыластарының алдын орап кетті.

Бүгін 31 қаңтарда әйелдер арасындағы спринт жарысынан Астана қаласындағы мамандандырылған жоғары спорт шеберлігі мектебінің штаттық командасының мүшесі Ольга Новикова қашықтықты 13:04,7 минутта басып өтіп, мәреге бірінші болып келді. Ол екінші орынға табан тіреген қытайлық Лиу Ксиаотинді 4,5 минутқа артқа қалдырды. Осылайша, Ольга Новикова 7-ші қысқы Азия ойындарының алғашқы алтын жүлдесін иемденді. Тағы бір біздің жерлесіміз Евгения Кузьмина мәре сызығын үшінші болып кесіп, қола жүлдегер атанды.

Осы жарыспен бір қатарда ерлер арасында шаңғымен бағдарлау бойынша сайыстар өткізілді. Онда біздің Михаил Сорокин 13,31 минут ішінде қашықтықты бағындырып, жеңіске жетті.